Veðurstöð var reist á Álfsnesi árið 2000 og hefur síðan skráð merkilega veðurfarssögu á þessum vindasama stað.  Auk vindáttar og vindhraða er skráður vindgustur, lofthiti, loftraki, úrkoma og sólargeislun.  Þar sem ekki er rafmagn á mælistað þá er vindrafall notaður til að hlaða rafgeyma.  Regnmælirinn er hitaður sem bætir virkni hans yfir vetrarmánuðina.  Veðurgögn eru skráð á 10 mínútna fresti sem er hefð í veðurmælingum.  Mæligögnin eru sótt sjálfvirkt og eru aðgengileg á notendavænni vefsíðu.  Verkfræðistofan Vista reisti veðurstöðina fyrir gatnamálastjórann í Reykjavík og hefur annast viðhald og gagnaþjónustu alla tíð.  Núverandi eigandi veðurstöðvarinnar er Sorpa.

Fyrir milligöngu Verkfræðistofunnar Eflu þá reisti Verkfræðistofan Vista tvær veðurstöðvar í Finnafirði þar sem Bremenports undirbýr byggingu stórskipahafnar.  Tilgangur með veðurstöðvunum er að fá öruggar upplýsingar um vinda á væntanlegur hafnarsvæði svo hægt sé að meta áhrif vinds á skip sem koma til hafnar.  Veðurstöðvarnar eru með sólarrafhlöðu sem orkugjafa og eru hannaðar til að vera afar straumlitlar og eru starfræktar á einum rafgeymi allan veturinn þegar sólar nýtur ekki.  Veðurgögn eru sótt reglulega með sjálfvirkum hætti og birtast á aðgangsstýrðri vefsíðu sem verkkaupinn hefur aðgang að.

Ísafjarðarhöfn er lífhöfn frá náttúrunnar hendi og hefur stækkað mjög undanfarin ár.  Fjöldi skipa og báta kemur til hafnar á degi hverjum.  Þá hefur skemmtiferðarskipum fjölgað mjög enda er þar góður viðlegukantur auk öruggs lægis á ytri höfninni.  Að ósk Ísafjarðarhafnar reisti Verkfræðistofan Vista veðurstöð við innsiglinguna til hafnarinnar sem mælir vind, sjávarhæð og -hita; þessar mælingar birtast í rauntíma á veðurvefsíðum á íslensku og ensku auk þess að vera aðgengilegar á vefsíðu ísafjarðarhafnar.  Viðhald og gagnaþjónusta við veðurstöðina er í höndum Vista.